उत्तर महाराष्ट्र आणि विदर्भात कडाक्याची थंडी; पश्चिम महाराष्ट्र आणि कोकणात तापमानात किंचित वाढ.
राज्यातील सध्याची थंडीची स्थिती
राज्यात सध्या थंडीचा संमिश्र प्रभाव पाहायला मिळत आहे. १७ डिसेंबर रोजी सकाळी राज्याच्या विविध भागांत तापमानात किंचित वाढ झाल्याचे दिसून आले. सोलापूर जिल्ह्यात जेऊर आणि करमाळा येथे ८ अंश सेल्सिअस, तर मोहोळमध्ये ९.६ अंश सेल्सिअस तापमानाची नोंद झाली. उत्तर महाराष्ट्रातील नाशिकमध्ये १०.४ आणि मालेगावमध्ये ९.८ अंश सेल्सिअस तापमान होते. विदर्भात नागपूर आणि गोंदिया येथे पारा ८.६ ते ९.६ अंशांपर्यंत खाली आला होता. दक्षिण महाराष्ट्रातील सांगली आणि कोल्हापूरमध्ये मात्र तापमान १६ ते १७ अंशांच्या दरम्यान राहिल्याने तेथे थंडीचा प्रभाव थोडा कमी जाणवला.
पूर्वेकडच्या वाऱ्यांमुळे तापमानात चढ-उतार
हवामान तज्ज्ञ किरण वाघमारे यांनी दिलेल्या माहितीनुसार, सध्या दक्षिणेकडून पूर्वेकडचे वारे राज्याकडे येत आहेत. या वाऱ्यांच्या प्रभावामुळे पश्चिम महाराष्ट्र आणि कोकणातील जिल्ह्यांत थंडी काहीशी कमी झाली असून तापमानात वाढ झाली आहे. सातारा, सांगली, कोल्हापूर आणि पुण्याच्या आसपासचे तापमान सरासरीपेक्षा थोडे अधिक आहे. दुसरीकडे, उत्तर महाराष्ट्र आणि विदर्भात मात्र तापमान सरासरीच्या तुलनेत कमी किंवा आसपास असल्याने तेथे थंडीची तीव्रता अद्यापही टिकून आहे.
१८ डिसेंबर आणि पुढील काही दिवसांचा अंदाज
१८ डिसेंबर रोजी धुळे, नंदुरबार, नाशिक, अहिल्यानगर, छत्रपती संभाजीनगर आणि सोलापूरच्या उत्तर भागात चांगली थंडी राहण्याचा अंदाज आहे. तसेच जालना, परभणी, बुलढाणा, अकोला, अमरावती आणि नागपूर या जिल्ह्यांतही ग्रामीण भागात तापमान ८ अंश सेल्सिअसपर्यंत घसरू शकते. मुंबई आणि कोकण किनारपट्टीच्या भागात तापमान १९ ते २२ अंशांच्या दरम्यान राहील, तर अंतर्गत भागात पालघर आणि ठाण्यामध्ये ते १४ अंशांच्या आसपास राहण्याची शक्यता आहे.
२२ डिसेंबरनंतर पुन्हा थंडी वाढणार?
हिमालयावर लवकरच एक नवीन ‘पश्चिमी आवर्त’ (Western Disturbance) पोहोचणार आहे. यामुळे २० ते २२ डिसेंबरच्या दरम्यान हिमालयीन भागात मोठी बर्फवृष्टी होईल. या बर्फवृष्टीनंतर उत्तरेकडून येणारे थंड वारे पुन्हा एकदा महाराष्ट्राकडे सरकतील. परिणामी २३-२४ डिसेंबरनंतर राज्यातील तापमानात पुन्हा एकदा मोठी घसरण होऊन कडाक्याची थंडी परतण्याची शक्यता आहे. तुरतास, १९ ते २१ डिसेंबरपर्यंत थंडीची तीव्रता स्थिर राहील, त्यानंतर वाऱ्याची दिशा बदलल्यामुळे तापमानात थोडी वाढ होऊन पुन्हा थंडीचा कडाका जाणवेल.
